BURESBOAHTIN ČÁLLIT!
TERVETULOA KIRJOITTAJAKSI!
ČÁLLINBOVDEHUS giđđat 2019, Didaktihkka Sámis: Lean ohcamin čálliid erenoamáš nummirii mas vuodjut didákttalaš geavadiidda, málliide, bargovugiide ja eará fáttáide mat gusket oahpaheaddji didákttalaš árgabeaivvi. Mun, Hanna Outakoski, lean dien erenoamáš nummira doaimmaheaddji. Doaivvun ahte mii sáhttit ovttas buvttadit áigečállaga nummira, mas juste didákttalaš fáttát leat guovddážis.
Didaktihkka gullá nannosit oktii pedagogihkain, mii lea oahpahusa vuođđooaidnu dahje perspektiiva. Ii leat čielggas ahte daid doahpagiid berrešii oba sirretge nu dárkilit. Dattege leat dehálaš ahte sámegiela ja kultuvrra oahpahusa didákttalaš geavadat ja bargomállet ožžot fuomášumi ain juo min iežamet servvodagas. Sámemánát, nuorat ja ollesolbmot ohppet giela ja kultuvrii gullevaš sisdoalu máŋgga vuogi mielde Sámis ja dál lea boahtán áigi álgit guorahallat, analyseret ja čalmmustahttit iešguđetgelágan oahpahusa, dan geavadiid ja málliid. Mii leat maiddái eamiálbmotoahpahusa diskurssas ja lea erenoamážit miellagiddevaš beassat čalmmustahttit dakkár oahpahusa mii vuolgá sámiperspektiivvas ja lea dan dihte eamiálbmotpedagogihkka. Dieđušge earáge oahpahusvuogit, mállet ja geavadat leat miellagiddevaččat ja leat goittotge vel dán rádjái leamašan bivnnuhat omd. dábálaš skuvlaoahpahusas.
Dán erenoamáš nummirii háliidivččen čohkket dieđalaš artihkkaliid mat čalmmustahttet juste didákttalaš perspektiivvaid giela ja kultuvrra oahpahusas Sámis ja sámemánáid várás. Sáhtášit jurddašit omd. čuovvovaš fáttáid iežat perspektiivvas:
- giellaoahpahusa mállet/geavadat – mallar och praktiker i språkundervisning
- kulturoahpahusa mállet/geavadat – mallar och praktiker i kulturundervisning
- dáhpáhusdutkamušat skuvllas (omd. giellalávgun dahje gáiddusoahpahus) – fallstudier i skolan (t.ex. språkbad och fjärrundervisning)
- oahpaheddjiid vásihusat – lärarnas upplevelser
- ohppiid vásihusat – elevernas/studenternas upplevelser
- buorit bargovuogit ja heajos bargovuogit – bra och sämre arbetssätt
- ođđa mállet – nya modeller
- eamiálbmotdidaktihkka sámeskuvllas/ sámididaktihkka eanetloguskuvllas – urfolksdidaktik i sameskolan/ samisk didaktik i majoritetsskolan
- dahje eará áigeguovdilis didákttalaš fáttát – eller andra aktuella ämnen.
Sádde maŋimusat 10.6.2019 du 100-150 sáni guhkkosaš abstrávtta čujuhussii hanna.outakoski@umu.se ja bija badječállosin Dutkansearvi. Muitte čállit abstrávtta bajit ravdii oktavuođadieđuid: čálli(t), ossodat/bargobáiki ja vel du iežat šleađgapoastačujuhus. Du abstrávtta oaččut čállit man beare sámegillii, suomagillii, ruoŧagillii, dárogillii dahje eaŋgalsgillii. Moadde vahkku siste maŋimuš máhcahanbeaivemearis oaččut dasto dieđu dohkkeheamis. Loahpalaš artihkkal berre leat čállon muhtin sámegillii. Gárvvis čállosiid sáddebehtet dasto munnje maŋimusat skábmamánu álggus ja mun sádden daid ovddos guvlui fágaguoibmeárvvoštallamii. Dát nummir boahtá olggos jagi loahpas dahje maŋimusat ođđajagimánus. Don ieš fuolahat giellabassamis ovdalgo mii sáddet dan árvvoštallamii, muhto dieđušge doaimmahusgoddi vel divusta teavstta loahpas ovdalgo lea áigi almmustahttit nummára.
Ovddit bovdehusat:
Dutkansearvvi dieđálaš áigečállaga goalmmát nummára earenoamáš fáddán lea sámi pedagogihkka.
Sáddes iežat abstrávtta sisa 1.10.2018 rádjái. Dutkansearvi bivdá pedagogalaš čállagiid vuosttaš veršuvnnaid sisa 31.12.2018 rádjái. Fágaguoibmeárvvoštallon čállosat almmuhuvvojit giđđat 2019 Dutkansearvvi elektrovnnalaš áigečállagis. Buot bajásgeassimii, oahpahussii ja oahppamii gullevaš dieđalaš čállosat gullet dán spesiálnummirii. Sámegiela ja -kulltuvrra ealáskahttin lea maid okta beroštahtti ja áigeguovdilis fáddá, man birra sávvat čállosiid.
Spesiálanummira doaimmaheaba Pigga Keskitalo ja Inker-Anni Linkola-Aikio.
Eambbo dieđut
pigga.keskitalo@samiskhs.no
inker-anni.linkola@samiskhs.no
Sádde iežat abstrávtta (max. 100 sáni) dutkansearvái dán siiddu liŋkka bokte (Lähetä tiedosto) maŋimustá 31.12.2018 diibmu 23:59. Oaččut vástádusa dan dohkkeheamis iežat rávdnjeboastačujuhussii. Abstrávtta sáhtát čállit man beare Suoma beale sámegillii, suomagillii dahje eŋgelasgillii.
Muitte čállit iežat oktavuohtadieđuid abstrávtta badjeravdii: čálli(id) nama, institušuvnna/ ossodaga/universitehta/ásahusa ja iežat e-boastačujuhusa.
ČÁLLINMOVTTA!