Faalâm tutkâmseervi äigičallui artikkâl “Uđđâ jienah – anarâškielâ oppâm rävisolmožin”. Artikkâl vuáđđun lii muu post doc –haahâ “Saamen kielten intensiivisen aikuisopetuksen vaikutukset Suomessa” (ivveest 2017→, ruttâdeijen Suomâ Kulttuurruttârááju). Hahhust mun tuuđhâm Suomâst iivij 2009 já 2016 kooskâst uárnejum sämikielâi (anarâškielâ, nuorttâlâškielâ já pajekielâ) oles ive pištevâš intensiivmáttááttâs vaikuttâsâid sämikielâi tilán. Amnâstâhân must lii cuáŋuimáánust 2017 čođâldittum koijâdâllâm, mon lam vuolgâttâm puohháid, kiäh láá luuhâm sämikielâ SMK oles ive škovliittâsâst ivveest 2011 ovdâskulij, já anarâškielâ tááhust meiddei toid, kiäh uásálistii luuhâmpaje 2009-2010 tievâsmittemškovliittâsân. Maŋeláhháá kiiđâ já keesi 2017 mield ááigum finniđ meiddei čieŋâlub sahhiittâllâmmateriaal uáppein já máttáátteijein.
Artikkâlist kieđâvušâm fáádá kielâ intensiivmáttááttâsâst já kielâ oppâmist rävisolmožin nomâlâssân anarâškielâ uáinusist. Taan abstrakt čälidijnân lam finnim koijâdâlmân 30 vástádâssâd anarâškielâ lohhein. Tievâsmittemškovlim 2009-2010 feeriimijn kávnoo ennuv oovdeb-uv materiaal (Olthuis et al. 2013; Pasanen 2015). Irâttâm artikkâlist hammiđ kove tast, maggaar ulmuuh vyelgih luuhâđ anarâškielâ já maggaar suujâi keežild, maht ive pištevâš škovliittâs tuáimá, maggaar feeriimeh ulmuin tast láá, moin naalijn sii uáppih kielâ já kevtiškyetih tom jieijâs elimistis. Koččâmuš sämikielâi uđđâ sárnoin lii kuávdáást, ko keččâp anarâškielâ tááláá tile já puátteevuođâ. Eenikielâlij sárnoi puáris puolvâ kiäppán ja uđđâ puolvâ lii eskin šoddâmin. Monâttum suhâpuolvâ sii kooskâst lii tot, kote kolgâččij toollâđ kielâ paijeen já sirdeđ tom ovdâskulij. Tiätu intensiivmáttááttâs puátusijn, vaikuttâsâin já vädisvuođâin puáhtá leđe ävkkin sämikielâi máttááttâs já iäláskittem vuáváámist já išediđ eres-uv almugijd sii viggâmušâin monâttum suhâpuolvâ uđđâsist huksiimân.
